تعلیق 7  [1]   (بسلسلہ: خلافت و ملوکیت، از ابن تیمیہ)

’پاس کرنا‘ نہیں ’’لوٹانا اللہ و رسولؐ کی طرف‘‘

فَرُدُّوہُ إِلَى اللّٰہِ والَّرسُول ’’تو لوٹاؤ اُسے اللہ اور رسولؐ کی طرف‘‘

اِن کلماتِ قرآنی کی تفسیر کے تحت امام ابن کثیرؒ لکھتے ہیں:

 ’’یہ خدائی حکم ہے کہ ہر وہ چیز جس میں انسانوں کا نزاع ہوا ہے، خواہ وہ اصولِ دین سے متعلق ہو یا فروعِ دین سے، صاف صاف کتاب و سنت کی طرف لوٹائی جائے، جیساکہ اللہ تعالیٰ نے فرمایا: وَمَا اِخْتَلَفْتُمْ فِيهِ مِنْ شَيْء فَحُكْمه إِلَى اللَّه ’’جو کچھ تمہارے مابین تصفیہ طلب ہو، اس کا فیصلہ خدا سے کروایا جائے گا‘‘۔ پھر جو کچھ فیصلہ کتاب اور سنت سے آجائے اور جو کچھ اس کی رُو سے حق ثابت ہو جائے بس وہی حق ہے۔ فَمَاذَا بَعْد الْحَقّ إِلَّا الضَّلَال ’’پھر حق کے بعد اور کیا رہ گیا بجز گمراہی کے؟‘‘۔

امام ابن جریر طبریؒ مشہور تابعی عالم میمون بن مہرانؓ  کا قول اس آیت کے حوالے سے نقل کرتے ہیں:

اللہ کی طرف لوٹانا یعنی کتاب۔ رسولؐ کی طرف لوٹانا یعنی سنت۔ پس جس شخص نے کتاب اور سنت کا حوالہ دے دیا گویا اُس نے دوسرے شخص کا منہ بند کردیا۔

منہ بند... یعنی بحث ختم۔ اس لیے کہ مسلم معاشرہ ہے! جماعتِ مسلمہ ہے! ’’اسلام‘‘ کے معنیٰ سے آگاہ ہے!  کتاب اور سنت جس شخص کا منہ بند نہ کرسکے تو بھلا کونسی چیز ہے جو اس کا منہ بند کرسکے؟

اس آیت کے تحت امام قرطبیؓ اپنی تفسیر میں کہتے ہیں: کچھ لوگوں نے یہ زعم اختیار کیا ہے کہ یہاں ’’اولی الامر‘‘ سے مراد ہے علیؓ اور ’ائمۂ معصومین‘۔ حالانکہ اگر یہ بات ہوتی تو اس کے بعد یہ الفاظ کہنے کا کوئی معنیٰ نہیں رہ جاتا کہ فَإِنْ تَنَازَعْتُمْ فِي شَيْءٍ فَرُدُّوهُ إلَى اللَّهِ وَالرَّسُولِ ’’پھر جہاں اختلاف کرلو وہاں اسے لوٹاؤ اللہ  اور رسول کی طرف‘‘۔  (اولی الامر سے مراد اگر ’ائمۂ معصومین‘ ہیں تو ان کے ساتھ ’’اختلاف‘‘ کرلینے والا بھلا کون ہوگا؟!)۔ اگر ایسا ہوتا تو پھر تو کہنا چاہئے تھا کہ معاملے کو امام اور اولی الامر ہی کی طرف لوٹاؤ، اور اسی (’امامِ معصوم‘)  کا قول ہی کتاب و سنت کے مقابلے پر محکم ہوتا!

امام قرطبیؒ کے بقول: (مسئلہ سے لاعلم ہونے کی صورت میں) صحابہؓ   کی زبانوں پر کثرت سے سنا جانے والا جملہ ’’اللہ ورسولہٗ اعلم‘‘ بھی دراصل ’’اللہ اور رسولؐ کی طرف لوٹانے‘‘ میں آتا ہے۔

قرطبیؒ حضرت عمرؓ      کا یہ قول نقل کرتے ہیں: ’’حق کی طرف لوٹ آنا باطل میں آگے بڑھتے چلے جانے سے کہیں بہتر ہے‘‘۔