تعلیق 5[1]

"اولی الامر" سے مراد

(اہل قوت و اہل علم)

’’اولی الامر‘‘ سے مراد ہے: مسلم جماعت کے والی، عہدہ دار اور امراء۔ تفسیر ماثور میں بھی یہ مذکور ہے؛ ابن جریر طبریؒ (مفسرین کے اقوال کا ایک طویل ذکر کرنے کے بعد) اسی کو ترجیح دیتے ہیں۔ تاہم یہ بات توجہ طلب ہے کہ سلف سے ماثور تفسیر میں جابجا ’’اولی الامر‘‘ سے مراد ’’اہل علم‘‘ اور ’’اہلِ فقہ‘‘ بھی کیا گیا ہے۔  صرف ابن جریر طبری کی تفسیر میں ہی یہ اقوال روایات کی کثرت کے ساتھ آپ کے سامنے آتے ہیں (ملاحظہ ہو تفسیر طبری بابت آیت 59 سورۃ النساء):

à     جابر بن عبد اللہ﷛: اُولِی الۡاَمۡرِ یعنی: تم میں سے اولی الفقہ

à     مجاہد:  اُولِی الۡاَمۡرِ یعنی: اولی الفقہ والعلم

à     ابن ابی نُجَیح: اُولِی الۡاَمۡرِ یعنی: اولی الفقہ فی الدین والعقل

à     ابن عباس﷛:  اُولِی الۡاَمۡرِ یعنی: اھل الفقہ والدین

à     عطاء بن السائب:  اُولِی الۡاَمۡرِ یعنی: اولی العلم والفقہ

à     عطاء بن ابی رباح:  اُولِی الۡاَمۡرِ یعنی: فقہاء و علماء

à     حسن بصری:  اُولِی الۡاَمۡرِ یعنی: علماء

à     ابو العالیۃ:   اُولِی الۡاَمۡرِ یعنی: اھل العلم۔

’ملاؤں کی حکومت‘ سے جھینپنے والے حضرات کےلیے درج بالا تفسیرِ ماثور میں سوچنے اور سمجھنے کےلیے یقیناً بہت کچھ ہے!

’’اُولِی الۡاَمۡرِ‘‘ کی تفسیر اس کثرت کے ساتھ ’’اہلِ علم و فقہ‘‘ کے الفاظ سے ہونے کے پیچھے جو دو بڑی حقیقتیں بول رہی ہیں، اور جوکہ ’’تیسری اطاعت‘‘ کے حوالے سے خصوصی طور پر قابل ذکر ہیں، وہ یہ ہیں:

»       قرآن کے تشکیل کردہ معاشرہ میں اصحابِ اقتدار اصل میں ’’علماء‘‘ ہی ہوتے تھے۔ وہاں چونکہ علمِ شرعی رکھنے والے لوگ ہی امارتوں اور عہدوں پر فائز تھے لہٰذا ’’علم‘‘ اور ’’امارت‘‘ لازم و ملزوم مانے جاتے تھے۔ چنانچہ ’’امر‘‘ بولتے تو ’’علم‘‘ ساتھ آتا اور ’’علم‘‘ بولتے تو ’’امر‘‘ خودبخود ساتھ آتا۔ یہی وہ نقطۂ مفقود ہے جس کی بازیافت حتی الامکان آج ضروری ہے۔

»       دوسرا یہ کہ ’’امراء و عہدہ داران‘‘ اگر کسی وقت ’’غیرعلماء‘‘ تصور کر بھی لیے جائیں تو یہ دونوں ایک دوسرے کےلیے واجبِ اطاعت ہوں گے۔ امیر، عالم کےلیے واجب اطاعت ہوگا انتظامی معاملہ میں۔ اور عالم، امیر کےلیے واجبِ اطاعت ہوگا شرعی وفکری معاملہ میں؛ جوکہ اہم تر ہے۔  بایں صورت عوام الناس کو بھی ’’انتظامی‘‘ معاملہ میں امراء کی اطاعت... اور ’’شرعی، فکری، تہذیبی اور نظریاتی‘‘ معاملات میں علماء کی اطاعت کرنا ہوگی... اور یہ دونوں طبقے (امراء وعلماء) عوام الناس کے حق میں، نیز ایک دوسرے کے حق میں، ’’اُولِی الۡاَمۡرِ‘‘ کہلائیں گے؛ ازروئے آیت و ازروئےتفسیرِ سلف۔ خصوصاً اس پر دیکھئے تفسیر ابن کثیر جو دونوں طرح کے اقوالِ سلف نقل کردینے کے بعد، اختتام پر، اپنی تقریر دیتے ہوئے لکھتے ہیں: الظَّاهِر وَاَللَّه أَعْلَم أَنَّهَا عَامَّة فِي كُلّ أُولِي الْأَمْر مِنْ الْأُمَرَاء وَالْعُلَمَاء كَمَا تَقَدَّمَ ’’ظاہر یہ ہوتا ہے، واللہ اعلم، کہ یہ آیت سبھی اولی الامر کو شامل ہے یعنی امراء بھی اور علماء بھی، جیساکہ پیچھے گزر چکا‘‘۔  (دیکھئے تفسیر ابن کثیر بابت سورۃ النساء آیت 159)

یہ ہے مسلم معاشرے کی ’’امامت‘‘۔  جوکہ اہل اسلام کی دولت اور خلافت کےلیے اساس فراہم کرتی ہے۔ شاید ہمارے لیے یہ اندازہ کرنا مشکل ہو کہ ’’جماعتِ مسلمہ‘‘ (مسلم معاشرے اور مسلم دولت) کی تشکیل اور قیادت میں ’’علمِ شرعی‘‘ اور ’’علمائے شریعت‘‘ کا کس قدر مرکزی کردار ہے۔ بلکہ اسے مسلم اجتماعیت اور مدنیت کی ریڑھ کی ہڈی کہا جائے تو غلط نہ ہوگا۔ ہو بھی کیوں نہ، خدا سے ڈرنے والے اور خدا کے مرتبے اور مقام (جوکہ آئینِ اسلامی کا مرکزی نقطہ ہے) سے اصل واقفیت رکھنے والے، نیز ’’جملہ معاملات کو اللہ اور رسول کی طرف لوٹانے‘‘  کا سلیقہ رکھنے والے علماء ہی ہیں: إِنَّمَا يَخْشَى اللَّهَ مِنْ عِبَادِهِ الْعُلَمَاءُ